Omog ampunguzia Kichuya majukumu ya kufunga

KOCHA Mkuu wa Simba, Joseph Omog,  amesema anahitaji kuona kila straika  wake anafunga mabao katika mzunguko wa kwanza wa Ligi Kuu ya Vodacom Tanzania Bara.

Omog alisema straika hao wakifanikiwa kufanya hivyo watakuwa wamejiweka katika mazingira mazuri ya kutwaa ubingwa wa ligi hiyo.

Omog alisema atahakikisha wanaendelea kuwapa mbinu mpya straika wake ili  waweze kufunga  mabao mengi kwa mechi tano zilizosalia za mzunguko wa kwanza.

Alisema anahitaji kumaliza mzunguko wa kwanza wakiwa na idadi ya mabao mengi ili waweze kuendelea kushika usukani wa ligi hiyo.

“Kila mechi nahitaji ushindi, Kichuya amekuwa na kasi nzuri ya kufunga kutokana na jinsi anavyotumia vyema nafasi anazozipata, lakini kwangu bado nahitaji mabao mengi na kila mchezaji afunge,” alisema.

Omog alisema anatambua ugumu wa mechi za ugenini kutokana na mazingira ya viwanja, lakini atapambana  kuhakikisha wanapata idadi kubwa ya mabao.