Dume Simba laichana Mbao

SIMBA imeendelea kujiimarisha kileleni baada ya leo kuichana Mbao bao 1-0 katika mchezo wa ligi kuu uliopigwa Uwanja wa Uhuru jijini Dar.

Simba ilionekana kusaka mabao tangu kipindi cha kwanza kilipoanza ambapo kipa wa Mbao, Emmanuel Mseja alizima ndoto za Wanamsimbazi hao kupata mabao mapema.

Hadi kipindi cha kwanza kimalizika timu hizo zilikuwa hazijafunga. Kipindi cha pili Simba walikuja juu huku washambuliaji wake wakiongozwa na Laudit Mavugo wakikosa mabao mara kwa mara.

Ilipotimia dakika ya 86, ingizo jipya la Simba msimu huu, Mzamiru Yassin aliipa bao safi Simba akiunganisha vyema pasi nzuri ya straika Blagnon na hivyo Simba kuwa na uhakika wa alama tatu kibindoni.

Kwa matokeo haya Simba inaendelea kukaa kileleni ikiwa na alama 26 baada ya kushuka uwanjani mara 10 na kushinda michezo nane huku miwili wakitoa sare.