Haji Mwinyi adai Simba imewashikia nafasi yao

BEKI wa kushoto wa Yanga, Haji Mwinyi amesema Simba ambayo kwa sasa inaongoza katika msimamo wa Ligi Kuu Bara imewashikia nafasi yao kwani muda wowote wataichukua.

Mwinyi aliyasema hayo hivi karibuni alipokuwa akizungumza na Championi Jumamosi baada ya Yanga kufanikiwa kuifunga Toto Africans mabao 2-0 kwenye Uwanja wa CCM Kirumba, Mwanza.

Mwinyi alisema Simba imewashikia nafasi hiyo kwa muda kwani siku yoyote wataichukua kwa sababu ligi bado ni mbichi na tofauti ya pointi iliyopo siyo kubwa.

Simba inaongoza ligi ikiwa na pointi 26 ambazo imezipata katika mechi zake 10 ilizocheza mpaka.

“Ligi bado mbichi sana lolote linaweza kutokea, hivyo Simba wasijiamini kuwa ubingwa tayari wameshaupata ila wanatakiwa kujua kuwa nafasi waliyopo sasa wametushikia na siku yoyote tutaichukua.

“Sisi tuna kikosi bora hivyo nawaomba wapenzi na mashabiki wa Yanga wasivunjike moyo ila wakae wakijua siku yoyote tutarudi katika nafasi yetu ambayo Simba wametushikia kwa muda,” alisema Mwinyi.