Yanga yaondolewa mbio za ubingwa

SIKU chache baada ya Yanga kuachana na kocha Hans van Pluijm, wachambuzi wa soka wamehofia uwezekano wa timu hiyo kutetea ubingwa wake msimu huu.

Yanga ambao ni mabingwa watetezi wa Ligi Kuu Tanzania Bara, mpaka sasa wanashika nafasi ya pili kwenye msimamo wa Ligi Kuu Tanzania Bara wakiwaacha mahasimu wao Simba kushika usukani kwa tofauti ya pointi tano.

Simba inaongoza Ligi Kuu Tanzania Bara ikiwa na pointi 29 baada ya kucheza michezo 11 huku mabingwa hao watetezi wakiwa na pointi 24 baada ya kushinda mchezo wa jana dhidi ya JKT Ruvu.

Wachambuzi mbalimbali wakiongozwa na mchezaji wa zamani wa Yanga, Ali Mayay, alisema klabu hiyo ya Jangwani msimu huu kuna uwezekano mdogo wa kutetea ubingwa kutokana na mambo jinsi yanavyokwenda ndani ya timu hiyo.

Alisema siku zote haishauriwi klabu kufanya mabadiliko ya kocha katikati ya msimu labda ikitokea dharura kubwa.

“Kila kocha huja na falsafa zake ndio sababu kubwa ambayo inashauriwa kubadilisha benchi la ufundi msimu unapomalizika hivyo ubingwa wa Yanga msimu huu ni bahati nasibu,” alisema.

Alisema Yanga wana kazi ngumu ya kutetea ubingwa huo huku wakiwa na upinzani mkubwa kutoka kwa watani zao wa jadi, Simba ambao hawajatetereka mpaka sasa.

“Kama kocha George Lwandamina anakuja na falsafa kama za Pluijm basi Yanga itaendelea kufanya vema, lakini kama anakuja na falsafa zake kama alivyofanya kocha wa Azam watafeli na wasitarajie kutetea ubingwa,” alisema.

Naye Kennedy Mwaisabula ‘Mzazi’, alisema Yanga kwa sasa ipo vizuri lakini mabadiliko hayo ya benchi la ufundi yanaweza kuwaathiri hasa kushuka kiwango.

 

“Yanga mpaka sasa wamecheza mechi 10 (kabla ya mchezo wa jana), lakini bado wana mechi 20 mkononi pamoja na mzunguko wa pili na wapo vizuri lakini mabadiliko haya yanaweza kuwavuruga na kupoteza mwelekeo,” alisema.

Alisema mabadiliko hayo yanaipa ugumu Yanga kutetea nafasi yao ya ubingwa walioupata mwaka jana hivyo wanapaswa kuwa makini kwa kipindi hiki.

“Mabadiliko yataigharimu timu sana, kwa sasa inafanya vema ila inaweza kupunguza morali yake, kwangu mimi sikuona tija kwa kipindi hiki wangesubiri msimu ujao,” alisema.