Huyu ndiye kocha wa mwisho wa Simba aliyeifunga Yanga

Yanga na Simba jana zilicheza mchezo wa 83 kwenye ligi kuu bara tangu mwaka 1965 ilipoanzishwa Ligi ya Taifa na sasa ligi kuu na aliyekuwa Kocha wa Taifa Stars, Milan Celebic.

Katika mchezo wa jana timu hizo zilitoka sare ya bao 1-1. Bao la Yanga lilifungwa na Amissi Tambwe huku Simba wakisawazisha kupitia kwa Shiza Kichuya.

Katika kipindi chote hicho, msisimko wa kuelekea mechi hizi umekuwa mkubwa, bila kujali nani anawania kitu gani na yupo katika kiwango kipi.

Msimu uliopita Simba haikuambulia kitu kwa Yanga kwani ilifungwa mechi mbili zote tena kwa idadi ya mabao 2-0 kwenye kila mchezo. Sasa katika mechi 13 za mwisho ambazo zimewakutanisha mahasimu hawa wa soka nchini, Kocha Goran Kopunovic wa Simba ndiye kocha wa mwisho kuifunga Yanga.

Kopunovic aliiongoza Simba kuifunga Yanga Machi 8, 2015 kwenye Uwanja wa Taifa, Dar es Salaam ambapo Simba ilishinda bao 1-0. Bao hilo pekee la Simba lilifungwa na Emmanuel Okwi dakika ya 53.

Ikumbukwe ya kuwa, Okwi raia wa Uganda alikuwa amerejea Simba baada ya kuwa katika mgogoro na Yanga aliyokuwa akiichezea siku za nyuma.

Licha ya kuifunga Yanga Machi 8, Simba iliachana na Kopunovic Mei 17, 2015 kwa kile kilichoelezwa kuwa haikuwa tayari kuongeza mkataba mpya na kocha huyo aliyetaka alipwe mshahara wa dola 9000 (Sh milioni 19.2) na kupewa fedha za kusaini mkataba mpya dola 50,000 sawa na Sh milioni 106.8.

Baada ya Kopunovic alipoondoka Simba ikampa kazi Dylan Kerr raia wa Uingereza ambaye naye alimuachia timu Jackson Mayanja wa Uganda ambaye sasa anamsaidia Joseph Omog wa Cameroon.