Lwandamina akubali kufanyakazi na Pluijm

KOCHA George Lwandamina, ambaye muda wowote atatua nchini kuinoa Yanga, amesema yupo tayari kufanya kazi na kocha wa sasa, Hans van der Pluijm, ambaye anatazamiwa kupewa cheo cha Mkurugenzi wa Ufundi.

Yanga wamefanya mazungumzo ya chini kwa chini na kocha huyo ambaye anaifundisha Zesco ya Zambia, ambapo wiki iliyopita alikuja nchini na taarifa zinadai kuwa alikutana na viongozi wa Wanajangwani hao na kufanya makubaliano ya awali.

Taarifa hizo ambazo hazina shaka, zinadai kuwa Yanga wamekubaliana na kocha huyo kumpa mkataba wa miaka miwili, licha ya kwamba pande zote mbili zimekuwa zikishindwa kuweka wazi jambo hilo.

Baada ya taarifa hizo kuvuja na kumfikia kocha wa sasa, Pluijm, Mholanzi huyo aliamua kuandika barua ya kujiuzulu, mpaka pale zilipofanyika juhudi za kumrudisha tena ambapo alikubali na leo atakuwa kwenye benchi wakati kikosi hicho kitakapowakabili Mbao FC Uwanja wa Uhuru.

Mmoja wa watu wa karibu wa Lwandamina ameliambia DIMBA kuwa, kocha huyo amesema hana tatizo lolote na anaweza kufanya kazi kwa ukaribu na Pluijm, lengo likiwa kuipatia Yanga mafanikio.

“Mwenyewe (Lwandamina) wala hana tatizo, yupo tayari kufanya kazi na Pluijm, kwani anatambua kuwa kocha huyo anao uwezo mkubwa sana na anayajua vizuri mazingira ya Tanzania.

“Yeye anaamini kwamba, akiwa kama kocha mkuu na Pluijm akawa mkurugenzi wa ufundi, wanaweza wakaifanya Yanga kuwa ya kimataifa zaidi na ndiyo maana hasiti kufanya kazi na mwenzake huyo,” kilisema chanzo hicho kutoka Zambia.

Taarifa zaidi zinadai kuwa, Lwandamina ambaye ana uzoefu mkubwa wa kufundisha soka, atatua jijini Dar es Salaam muda wowote kuanza kibarua chake na viongozi wa Yanga wanataka kukaa meza moja na Pluijm kumshawishi akubali cheo kipya cha ukurugenzi wa ufundi.