Mavugo: Nusura Yondani anitoe roho

MSHAMBULIAJI wa Simba, Laudit Mavugo, amesema kwa sasa anashindwa kufunga kutokana na mabeki wa timu pinzani kumpania akitolea mfano Kelvin Yondani wa Yanga.
Mavugo alisema kwa sasa anachezewa rafu nyingi na mabeki wa timu pinzani kitu ambacho kinampa wakati mgumu kufanya kile ambacho mashabiki wa Simba wanakitaka.
Alitolea mfano jinsi alivyodhibitiwa na mabeki wa Yanga akiwamo Yondani mchezo wa mwishoni mwa wiki iliyopita uliomalizika kwa sare ya kufungana bao 1-1 Uwanja wa Taifa jijini Dar es Salaam.
Mavugo alitupia kwenye mtandao wake picha ambayo amebanwa vilivyo na Yondani na blog hii ilipomuuliza ana maana gani ndipo aliposema ndivyo anavyokamiwa.

 “Ninashindwa kufanya vizuri kutokana na jinsi mabeki wanavyonikamia, wewe mwenyewe angalia hiyo picha kwenye mtandao wangu jinsi huyo beki (Yondani) anavyofanya,” alisema.
Hata hivyo, alisema licha ya kwamba mabeki wanamkamia lakini atahakikisha anafunga mabao mengi iwezekanavyo na kuisaidia timu yake ya Simba kuibuka na ubingwa msimu huu ikizingatiwa ligi bado mbichi.