Ruvu yatamba kupeleka kilio Azam

KIKOSI CHA RUVU

KOCHA Mkuu wa Ruvu Shooting,  Seleman Mtungwe, amesema atapeleka kilio kwa kuibuka na ushindi katika mechi ya Ligi Kuu Tanzania Bara dhidi ya Azam itakayochezwa keshokutwa kwenye Uwanja wa Azam Complex,  jijini Dar es Salaam.
Mtungwe alisema ana uhakika wa kuibuka na ushindi kutokana na maandalizi waliyofanya katika kikosi chake.
Mtungwe alisema wachezaji wake wana ari ya kufanya vizuri kwenye mechi hiyo ili waweze kujiongezea pointi katika msimamo wa ligi.
Alisema anafahamu mechi hiyo itakuwa ngumu kwani Azam hawatakubali kufungwa mara tatu mfululizo baada ya kufungwa bao 1-0 na Simba kisha mabao 2-1 na Ndanda, lakini wamejipanga kwa lengo la kuondoka na pointi tatu.

AZAM WAKIWA MAZOEZINI

Mtungwe alisema wamefanya marekebisho madogo madogo kutokana na makosa yaliyojitokeza kwenye mechi zilizopita ili yasijirudie katika mechi hiyo.
Azam wanashika nafasi ya nne katika msimamo wa ligi hiyo kutokana na pointi 10 huku Ruvu wakiwa wa 10 ambao wana pointi nane baada ya kila moja kucheza mechi sita.