PAMOJA na timu
yake kufungwa mabao 2-1 na Simba, Ofisa Habari wa Ruvu Shooting, Masau Bwire
amemponda straika Laudit Mavugo kwa kusema hajafikia kiwango cha Donald Ngoma
wa Yanga.
Licha ya Mavugo anayechezea
Simba kufunga bao moja na kuiwezesha timu yake kupata ushindi huo, Bwire
amecheka na kusema: “Mavugo si lolote na hawezi kumfikia Ngoma kwa jinsi
anavyocheza.”
Katika mchezo huo
wa Ligi Kuu Bara uliochezwa Jumatano wiki hii kwenye Uwanja wa Uhuru, Dar es
Salaam bao lingine la Simba lilifungwa na Ibrahim Ajib akisawazisha lile la
Ruvu Shooting lililofungwa na Abdulhalimu Musa.
Bwire alisema kuwa,
licha ya Mavugo kufunga bao la ushindi kwa timu yake, alishindwa kutumia nafasi
nyingi za kufunga alizopata tofauti na Ngoma anavyofanya.
“Mavugo hakuwa na
lolote lenye kukushawishi useme anatisha. Ni mtu wa kawaida sana, sema alikuwa
na bahati ya kufunga, mabeki wetu walijichanganya tu.
“Huwezi
kumlinganisha (Mavugo) na mtu kama Ngoma, yule ndiye straika aliyekamilika.
Anamiliki mpira, anafunga na ni mtu msumbufu sana, tofauti na huyo Mavugo,”
alisema Bwire ambaye pia ni mwalimu wa shule ya msingi.
Post a Comment