Khaa.. Omog bhana kasema eti Yanga ni kama Majimaji

KOCHA OMOG WA KWANZA KUSHOTO

KOCHA Mkuu wa Simba, Joseph Omog anauchukulia mchezo wao dhidi ya Yanga kama timu yake inacheza dhidi ya Majimaji tu.

Kauli hiyo ameitoa ikiwa siku moja kabla ya mchezo wa watani wa jadi wa Simba na Yanga utakaopigwa kesho Jumamosi kwenye Uwanja wa Taifa jijini Dar es Salaam.

Mcameroon huyo, atakaa benchi kwa mara kwanza katika 'derby' ya Simba na Yanga mechi inayotarajiwa kujaa upinzani mkubwa kutokana na maandalizi ya kila timu kuhakikisha wanavuna pointi tatu.

Oog alisema mechi hiyo anaichukulia ya kawaida kama ilivyokuwa michezo mingine ikiwemo na Majimaji aliyocheza nayo na kufanikiwa kuifunga mabao 4-0 wikiendi iliyopita.

Omog alisema, mechi za aina hiyo presha inakuwepo nje ya uwanja kwa mashabiki na siyo kwa wachezaji wanaokuwepo uwanjani wakitimiza majukumu yao.

Aliongeza kuwa, kwa maandalizi ya timu yake aliyoyafanya yanatosha kabisa kupata ushindi kwenye mechi hiyo, licha ya wapinzani wao nao kujiandaa.

"Maandalizi ya timu yapo vizuri kabisa kwa maana ya wachezaji wote wapo kwa ajili ya mchezo wetu wa Jumamosi, tayari nimemaliza majukumu yangu ya ndani ya uwanja ambayo ni kuwapa mbinu za ushindi wachezaji wangu.

"Hivyo, kilichobakia ni kuisubiria mechi yenyewe ambayo presha kubwa ipo kwa mashabiki lakini siyo kwa wachezaji na benchi la ufundi.

"Nikiwa kama kocha na wachezaji wangu, tunauchukulia mchezo huo kama michezo mingine vile ya ligi kuu tunayoicheza ukiwemo na Majimaji tuliyocheza nayo hivi karibuni," alisema Omog.