Wachezaji Yanga wafanyiwa ‘sapraizi’ usiku

WAKATI leo Jumamosi jioni Yanga ikitarajiwa kucheza na Majimaji katika Ligi Kuu Bara kwenye Uwanja wa Taifa, mabosi wa timu hiyo wakiongozwa na mwenyekiti wao, Yusuf Manji juzi Alhamisi usiku walikutana ghafla na wachezaji wa kikosi hicho kupanga mikakati ya ushindi.

Hatua hiyo imekuja muda mfupi baada ya wachezaji hao kuwasili jijini Dar es Salaam wakitokea Mtwara walipokuwa wamecheza na Ndanda FC.

Jumatano wiki hii, Yanga ilitoka suluhu na Ndanda ugenini mkoani Mtwara kwenye Uwanja wa Nangwanda Sijaona na kuonekana kama kasi yao imepunguzwa.

Kabla ya kutoka sare hiyo, Yanga ilikuwa imeifunga African Lyon mabao 3-0 katika mechi yake ya kwanza ya Ligi Kuu Bara.

Katika kikao hicho kilichofanyika kwenye hoteli moja iliyopo ufukweni mwa Bahari ya Hindi, Manji akiwa na viongozi wote wa Kamati ya Mashindano walikutana na wachezaji na benchi zima la ufundi la Yanga.

Manji na mwenyekiti wa kamati hiyo, Mhandisi Paul Malume, walikutana na wachezaji hao ili kuweka mikakati ya kutetea ubingwa wao wa ligi kuu baada ya kuona wametoka suluhu na Ndanda.

Kwa mujibu wa chanzo chetu cha habari kilichokuwepo hotelini hapo, kikao hicho kilianza saa 2:30 usiku na kilitumia muda wa saa moja ambapo wachezaji walipewa ahadi mbalimbali ili waweze kupata ushindi.

“Tulikuwa tunaweka mikakati maana ile sare ya Ndanda kidogo imetufanya tushtuke natumekubaliana baadhi ya mambo na wachezaji pamoja na benchi la ufundi.

“Utekelezaji wa mambo hayo unaanza katika mechi yetu na Majimaji kesho (leo) Jumamosi, tunataka kushinda mechi hii na nyinginezo ili tuweze kutetea ubingwa.

“Wachezaji wamepewa motisha mbalimbali zitakazowafanya wafanye vizuri uwanjani kwani licha ya kutambua kuwa ni jukumu lao lakini lazima tukubali ligi ni ngumu,” kilisema chanzo hicho.