MIKWARA mingine bwana! Obrey Chirwa wa Yanga na Paul Pogba wa Manchester United ndio walikuwa gumzo kutokana na kushindwa kuonyesha cheche zao, lakini Pogba kajinasua kwenye mtego huo na sasa amebakia Chirwa.
Sasa unajua ikoje? Baada ya Chirwa kusikia kuwa Pogba yeye kawaridhisha mashabiki wake kwa kufunga dhidi ya Leicester City, naye ameibuka na kusema atawakomesha Simba.
Pogba, ambaye alisajiliwa na Manchester United kutoka Juventus ya Italia kwa fedha kubwa, alianza kwa kusuasua mpaka akawa gumzo kila sehemu, lakini alifanikiwa kuonyesha uwezo mkubwa dhidi ya Leicester City, akifunga bao moja katika ushindi wa mabao 4-1.
Chirwa, ambaye amesajiliwa kwa fedha kubwa na Yanga kutoka FC Platinum ya Zimbabwe, naye hajaonyesha kiwango kizuri kinachowashawishi mashabiki, lakini sasa amesema hiyo Oktoba Mosi ndiyo Simba watajua.
“Ni kweli sijafunga bao lolote, ila nawaahidi mashabiki kwamba mchezo na Simba kwa kushirikiana na wenzangu tutapambana kuhakikisha tunashinda, nadhani nitakuwa na furaha kubwa kama nitafunga, japo kikubwa ni kuona Yanga ikiibuka na ushindi,” alisema.
Yanga wanakutana na Simba Jumamosi ya wiki hii Uwanja wa Taifa, jijini Dar es Salaam, katika mchezo ambao kama Chirwa atafunga atajitengenezea jina kubwa, kama ilivyo kwa Pogba, aliyekuwa akipondwa.
Post a Comment