Simba: Yanga njooni Taifa tuwanyooshe

USHINDI wa mabao 4-0 walioupata Simba kwenye mchezo wao juzi dhidi ya Majimaji, umewapa kiburi timu hiyo na kuamua kuwaita mashabiki wa Yanga kwenda kwa wingi Uwanja wa Taifa Oktoba mosi, timu hizo zitakapokutana.

Wito huo umetolewa na Kocha Msaidizi wa Simba, Jackson Manyanja, ambaye aliwataka mashabiki hao wa Yanga kuhudhuria kwa wingi mpambano huo kwani wanaamini wataibuka na ushindi.

Akizungumzia maandalizi yake kuelekea mchezo huo, Mayanja alisema kikosi chake kipo sawa, huku lengo likiwa moja tu ambalo ni ushindi.

“Tunapaswa tukubali hii ni mechi kubwa, hivyo kama tungepoteza mchezo wetu na Majimaji, morali ingeshuka kwa wachezaji na hata mashabiki, hivyo ushindi huu umetupa morali kubwa zaidi ya pambano letu na Yanga,” alisema.

Mayanja alisema Simba sasa iko tayari  kuwakabili Yanga kwa kuwa kikosi kimeiva na wana uhakika wa kushinda mechi hiyo, na kwa wapenzi wa Yanga waliozoea kuionea Simba, wafike Taifa kushuhudia kitakachowakuta.

“Msimu uliopita, nilipewa jukumu la kuinoa timu na sikuwa na muda mzuri kama huu wa sasa, kwa sasa tuko vichwa viwili na Joseph Omog, nadhani mnaona kinachoendelea,” alisema Mayanja.

Alisema kamati ya usajili chini ya mwenyekiti wake, Zacharia Hanspope, imefanya kazi kubwa ambapo Simba msimu huu kamwe haitegemei mchezaji mmoja.

“Kwenye mpira lolote linaweza kutokea, lakini sisi tunachojivunia zaidi ni kuwa na wachezaji wengi zaidi ambao wote wana uwezo wa kubadili matokeo na hatutegemei mchezaji mmoja, mfano alipoingia Mohammed Ibrahim wote mliona ni jinsi gani alibadilisha mchezo,” alisema.

“Mtakumbuka mwaka jana tulikuwa na tatizo la wachezaji, hata mechi yetu ya mwisho tuliocheza na Yanga tulimpanga Abdi Banda kama beki wa kati, lakini sasa tuna wachezaji kila sehemu,” alisema.

Alipoulizwa ni mchezaji gani ndani ya kikosi cha Yanga anayemhofia, Mayanja alisema wachezaji pekee anaowahofia ni nyota wake wa Simba ambao ndio watakaoleta matokeo kwenye mchezo huo.

“Mechi hiyo ni kama fainali, hakuna tunayemhofia Yanga, nawaogopa nyota wangu wa Simba ambao ndio watakaoleta matokeo siku hiyo,” alisema.

Alisema atalifanyia kazi tatizo la uchoyo la wachezaji wake linalojitokeza kwenye michezo mbalimbali mpaka sasa.

“Hili suala lazima tulifanyie kazi mapema kabla halijakuwa, mtu akifunga bao si lake ni la timu nzima, hivyo ni jambo ambalo wanapaswa kulijua na tunalifanyia kazi,” alisema.