Yanga yamruhusu Niyonzima kuondoka

UONGOZI wa Yanga, umesema kuwa unawaruhu mchezaji ambaye mkataba umemalizika kuondoka kama ataona maslahi yake ni madogo kwenye timu hiyo inayojiandaa na mzunguko wa pili wa Ligi Kuu Bara.

Kauli hiyo, ameitoa kutokana na idadi kubwa ya wachezaji ambao mikataba yao inamalizika mwishoni mwa msimu huu wa ligi ambao ni Vicent Bossou, Haroun Niyonzima, Donald Ngoma.

Wengine ni Haji Mwinyi, Nadir Haroub 'Cannavaro', Deus Kaseke, Anthony Matheo, Thabani Kamusoko, Amissi Tambwe na Mbuyu Twite ambaye yeye mkataba wake umemalizika mwezi huu.

Makamu Mwenyekiti wa timu hiyo, Clement Sanga alisema bado wanahitaji kuendelea na wachezaji wote kwenye misimu mingine ijayo ya ligi kuu, lakini hawatamzuia yule atakayetaka kuondoka kufuata maslahi mazuri.

Sanga alisema, kanuni za Shirikisho la Soka la Kimataifa (Fifa), zinawaruhusu wachezaji hao kufanya mazungumzo na klabu nyingine watakazohitaji, hivyo hawatawazuia wale watakaotaka kuondoka Yanga.

"Ni kweli kabisa kanuni na sheria za Fifa zipo wazi kuwaruhusu wachezaji waliobakiza miezi sita kufanya mazungumzo na klabu nyingine, lakini tunatoa nafasi kwa wale wachezaji ambao mikataba yao imemalizika watakaotaka kuondoka Yanga kwenda kufuata maslahi mazuri.

"Ni ngumu kumzuia mchezaji aliyeona maslahi mazuri kwingine, hivyo basi tutamruhusu kuondoka kama unavyojua wachezaji soka ndiyo ajira yao, hivyo hatutaweza kuwazuia kuondoka Yanga.

"Nimepata taarifa mbalimbali za wachezaji wetu kuondoka mara baada ya mikataba yao kumalizika mwishoni mwa msimu huu wa ligi kuu nami nabariki hilo," alisema Sanga.