Ilikuwa lazima Yanga wafungwe

YANGA ilipata kipigo cha mabao 2-1 kutoka kwa Mbeya City katika Ligi Kuu Bara kwenye Uwanja wa Sokoine jijini hapa, lakini nyuma ya pazia kuna mambo kadhaa ambayo yalifanyika na kikubwa kinachotajwa ni hujuma ili Yanga ipoteze mchezo huo.

Kufungwa kwa Yanga katika mchezo huo ni pigo kubwa kwao kwa kuwa sasa wameachwa kwa pointi nane dhidi ya Simba ambao ndiyo wanaoongoza ligi hiyo wakati Yanga wakishika nafasi ya pili wakiwa na pointi 27.

Akizungumza na gazeti hili kabla ya mchezo huo uliochezwa juzi Jumatano, kiongozi mmoja wa Yanga ambaye yupo Mbeya, alianza kusema kuwa kulikuwa na kampeni kubwa iliyofanyika kuhakikisha Yanga inafungwa na hiyo inafanywa kuanzia ngazi za juu za uongozi wa mkoa.

Yanga yazuiwa kufanya mazoezi

Muda mfupi kabla ya mchezo huo, kigogo huyo alikutana na Championi Ijumaa na kufunguka:

“Kuna hujuma ya kiwango cha juu inafanyika ili tufungwe, mimi nilizipata hizo taarifa hata kabla ya timu (Yanga) kufika hapa Mbeya, niliambiwa hadi (anataja jina) anahusika kwenye kampeni hiyo.

“Kuna figisu nyingi zimefanyika kabla ya mchezo, jana (Jumanne) tulitakiwa kufanya mazoezi kwenye Uwanja wa Sokoine, asubuhi, tulipofika hapa tukawakuta makomandoo wa Mbeya City, wakagoma kutupisha wakati utaratibu unasema sisi pia tunatakiwa kufanya mazoezi uwanjani hapo siku moja kabla ya mchezo.

“Tulichofanya tukaanza kuwasiliana na mamlaka husika watusaidie, lakini huko nako chenga zikawa nyingi, baadaye tukawasiliane na mamlaka za juu kabisa za mkoa kiusalama kuja kutusaidia, napo tulianza kupigwa chengachenga awali.

“Baadaye kidogo jeshi la polisi likafika uwanjani hapo na kuwaondoa makomandoo hao, ndipo ukaruhusiwa kufanya mazoezi.”

Jioni hali ikawa tete

“Baadaye jioni Yanga ilikuwa na ratiba ya kufanya mazoezi tena uwanjani hapo, lakini hilo halikuwezekana kwa kuwa makomandoo wa Mbeya City walikuwepo na kulitokea vurugu nyingi kati yao na sisi, mwisho timu haikufanikiwa kufanya mazoezi kabisa,” anasema kiongozi huyo.

Vurugu usiku, kulinda uwanja

Taarifa zinaeleza usiku wa kuamkia mchezo huo, kulitokea vurugu pia baina ya wasimamizi wa Yanga na Mbeya City ambao wote walikuwa wakitaka kulinda uwanja huo.

“Kulikuwa na pande tatu zinazolinda, Yanga, Mbeya City na Suma JKT ambao ndiyo walinzi wa siku zote wa uwanja huo,” alisema shuhuda wa tukio hilo.

Alipotafutwa Meneja wa Uwanja wa Sokoine, Vedastus Mwaluka, alisema: “Ni kweli kulikuwa na vurugu usiku, wale watu wa Yanga na Mbeya City walikuwa wakifanyiana vurugu sana kuanzia asubuhi (Jumanne).

“Kwanza ile ya asubuhi Yanga ndiyo walitakiwa kufanya mazoezi na walichokifanya Mbeya City kuwafanyia wenzao vurugu kwa kweli sikukipenda. Yanga walipiga simu polisi ambao walifika na kutatua mgogoro uliokuwepo.

“Jioni pia kulitokea mvurugano baina ya pande hizo mbili, usiku napo hali ikawa hivyohivyo, ubabe wao uliwazidi nguvu wale walinzi wa Suma JKT na hivyo nikalazimika kupiga simu polisi, walifika na kuwatoa wote hali ikatulia, mpaka naondoka uwanjani saa nne kasoro usiku, niliacha pametulia na kuwataka Suma JKT kama kukitokea chochote wanijulishe.”