Alichosema pluijm kuhusu Simba na nafasi ya ubingwa

KOCHA wa Yanga, Hans van Der Pluijm amesema atahakikisha timu yake inaifunga Prisons, kesho Jumapili kwenye Uwanja wa Sokoine jijini hapa lakini wachezaji wa timu hiyo wameiambia Simba kamwe isijidanganye kuhusu kutwaa wa Ligi Kuu Bara ubingwa msimu huu.

Pluijm baada ya kupoteza mechi dhidi ya Mbeya City, Jumatano wiki hii kwa kufungwa mabao 2-1, amesema atahakikisha wanapata pointi tatu dhidi ya Prisons na kupunguza tofauti ya pointi kati yao na Simba.

Simba ipo kileleni mwa ligi kuu ikiwa na pointi 35 katika mechi 13 kama ilizocheza Yanga yenye pointi 22 ikiwa nafasi ya pili.

“Mambo mengi yalitokea tukapoteza dhidi ya Mbeya City, lakini hiyo haiwezi kuwa maana ya kupoteza mechi zote za Mbeya, tuna mechi na Prisons naamini tutafanya vizuri baada ya maandalizi ya uhakika.

“Tumebadilika kidogo hasa katika mbinu ili tuweze kupata pointi tatu ambazo zitapungua pointi kati yetu na timu inayoongoza, naamini itakuwa hivyo,” alisema Pluijm.

Naye Kocha wa Prisons, Meja Mstaafu Abdul Mingange alisema: “Watu wasione Yanga sababu imefungwa na Mbeya City basi na sisi ni lazima tuifunge, soka halipo hivyo lakini hatutakubali kufungwa na Yanga.

“Yanga ni timu kubwa yenye uzoefu na inayojua kupambana, sasa mashabiki wategemee soka la ushindi uwanjani ila wasidhani kama kila kitu ni kirahisi.”

Straika Amissi Tambwe na nahodha wa Yanga, Haruna Niyonzima, kwa pamoja wamesema kufungwa na Mbeya City hakujawakatisha tamaa ya kutetea ubingwa wao na kamwe Simba wasijidanganye.

“Simba wasijidanganye kuhusu ubingwa eti kwa sababu wanaongoza, bado kuna mechi nyingi mno ambazo zinaweza kuwaweka chini na sisi tukaibuka,” alisema Tambwe.

Naye Niyonzima alisema: “Kupoteza mechi mbili inauma sana, lakini hiyo si sababu ya kupoteza ubingwa na Simba japokuwa wanaongoza ligi wasidhani sisi tumelala, hapana kilichotokea kwetu ni bahati mbaya tu.”