Muheza, Sifa Politan kuzindua FA Cup leo

TIMU za Muheza United ya Tanga na Sifa Politan ya Dar es Salaam, leo Jumamosi zinatarajiwa kufungua dimba la michuano ya Kombe la Shirikisho (FA), mchezo utakaopigwa Uwanja wa Mkwakwani, Tanga.

Michuano ya msimu huu inazishirikisha timu 86 kutoka 64 za msimu uliopita ambapo bingwa mtetezi ni Yanga. Timu 16 ni za Ligi Kuu Bara, 24 za Ligi Daraja la Kwanza, 24 za Daraja la Pili na timu 22 za mabingwa wa mikoa ambapo michuano itakuwa ni ya mtoano na itaendeshwa kwa raundi tisa.

Ofisa Habari wa Shirikisho la Soka Tanzania (TFF), Alfred Lucas, amesema: “Kabla ya kuanza kwa mchezo wa ufunguzi, kutapigwa mechi ya maveterani wa Coastal Union dhidi ya African Sports ambapo mchezo huo utaanza saa 8:00 mchana.”