Mkataba mpya wamgombanisha Mkude, mama yake

KIUNGO mkabaji na nahodha wa Simba, Jonas Mkude hivi karibuni amejikuta katika wakati mgumu na asijue la kufanya baada ya kutofautiana na mama yake kisa timu yake hiyo.

Inadaiwa kuwa sababu kubwa ya hali hiyo ni kuwepo kwa taarifa kuwa Mkude tayari amesaini mkataba wa miaka mitatu wa kuendelea kuitumikia Simba bila ya kumshirikisha mama yake.

Mkataba wa zamani wa Mkude ambao aliingia takriban miaka miwili iliyopita, unatarajia kufikia tamati hivi karibuni.

Habari za kuaminika kutoka kwa rafiki wa karibu wa Mkude ambazo gazeti hili lilizipata zimedai kuwa baada ya mama yake kuziona taarifa hizo, alimpigia simu mwanaye huyo na kumuuliza kwa nini kafanya hivyo bila ya kumshirikisha.

“Ilikuwa ni balaa kwani mama yake alikuwa haelewi chochote kile alichokuwa akiambiwa Mkude kuhusiana na suala hilo mpaka alipopata ukweli kutoka kwa mwanasheria wake ndipo akatulia.

“Kikubwa mama yake Mkude alichokuwa anakilalamikia ni kwamba, kwa nini asaini mkataba bila ya kumshirikisha, wakati anapopata matatizo yeye ndiye anakuwa wa kwanza kumshirikisha na anampatia ushauri lakini katika hili la mkataba kwa nini kafanya kimyakimya?” kilisema chanzo hicho cha habari na kuongeza:

“Hata hivyo, ukweli wa hilo ni kwamba Mkude hajasaini mkataba wowote na Simba mpaka sasa ila viongozi wa timu hiyo wameamua kufanya hivyo ili kuzipoteza maboya timu ambazo zinamhitaji  na zipo katika mazungumzo naye,” kiliongeza chanzo hicho.

Alipoulizwa Mkude kuhusiana na suala hilo, alisema: “Siwezi kulizungumzia suala hilo ila ninachoweza kusema ni kwamba bado naendelea kuutumikia mkataba wangu wa zamani na Simba ambao utafikia tamati hivi karibuni.

“Kuhusu suala la kusaini au kutosaini mkataba mpya kwa sasa siwezi kulizungumzia ila tambua kuwa bado nautumikia mkataba wangu wa zamani ambao utafikia tamati hivi karibuni.”