Mkude: Siriaz nasaini Yanga

JONAS Mkude amesema klabu yoyote ikimfuata kwa ajili ya kumsajili, ikiwemo Yanga, haraka atakwenda kumwaga wino, kwani Simba hivi sasa inamzingua tu.

Mkude ametoa kauli hiyo akizungumza na waandishi wetu wikiendi iliyopita, ukiwa ni muda mfupi baada ya taarifa kuibuka kuwa mfanyabiashara maarufu hapa nchini, Mohammed Dewji ‘Mo’ alimwaga fedha Msimbazi kuhakikisha kiungo huyo na fowadi Ibrahim Ajibu wanasaini mikataba mipya.

Wachezaji wao ambao Simba imewalea kwa muda mrefu kuanzia kikosi cha vijana, mikataba yao inamalizika mwezi Januari na Mei mwakani.

Mkude ambaye mkataba wake na Simba unafikia tamati mwezi Januari, mwakani, alisema mpaka sasa haelewi chochote kama ataendelea kuitumikia timu hiyo au la.

Alisema mpaka sasa hajafanya mazungumzo yoyote na uongozi wa timu hiyo na umekuwa ukimzungusha mara kwa mara jambo ambalo limemfanya aone kuwa hahitajiki ndani ya kikosi hicho, hivyo amewataka Yanga wakamsajili kama kweli wanamhitaji na akasisitiza kuwa yeye yupo tayari kujiunga na timu hiyo.

Mkude alisema viongozi wa Simba wamemzingua zaidi baada ya kutangaza kuwa tayari ameshasaini mkataba wakati siyo kweli.

“Jamaa siwaelewi kabisa, naona wananichukulia poa kwani wamekuwa wakinizungusha kuhusiana na mkataba mpya kila ninapowauliza, matokeo yake wakaamua kuniharibia kuwa nimeishasaini tayari, jambo ambalo si kweli.

“Soka ndiyo maisha yangu, hivyo kutokana na hali hii, nipo tayari kujiunga na timu yoyote ile ambayo itanihitaji, kama Yanga wapo tayari kunisajili mimi sina tatizo waje tu, tuzungumze na tukikubaliana nitajiunga nao. Ninaangalia Maslahi ili kuboresha maisha yangu. Hapa nilipo namsubiri mtu wangu mmoja amesafiri anarudi kesho (leo Jumatatu), ili tuangalie kama nitamwaga wino Simba au sehemu nyingine,” alisema Mkude ambaye pia ni nahodha wa Simba.

Hata hivyo, habari za kuaminika kutoka ndani ya Simba ambazo gazeti hili lilizipata jana, zilidai kuwa uongozi wa timu hiyo ulikuwa ukutane na Mkude, Ijumaa iliyopita kwa ajili ya kuzungumzia suala hilo la mkataba mpya.

Lakini mazungumzo hayo yaligonga mwamba baada ya Mkude kutotokea na alipopigiwa simu alidai kuwa safarini Morogoro, hivyo asingeweza kufika kwa wakati, hivyo watafute siku nyingine.

 “Ukweli ni kwamba siku hiyo hakuwa Morogoro, bali alikuwa nyumbani na mimi nilikuwa naye ila aliamua kutokwenda kukutana na viongozi hao kwa kile alichodai kuwa wanaonyesha dharau dhidi yake, hivyo hawezi kuonana nao mpaka awe na mwanasheria wake ambaye siku hiyo hakuwepo Dar es Salaam.

“Hata hivyo, viongozi wa Simba wanatakiwa kuwa makini kama kweli bado wanamhitaji Mkude katika kikosi chao, vinginevyo ikifika mwezi Januari hawajamalizana naye anaweza kutimka kwani Yanga wanamsumbua kila siku ila yeye amekuwa akiogopa kuwa watu watamuonaje kama atajiunga na timu hiyo na kuiacha ile ambayo imeibua kipaji chake,” kilisema chanzo hicho cha habari.