Simba kuitikisa Dodoma leo

TIMU ya soka ya Simba inatarajiwa kucheza mchezo wa kirafiki dhidi ya Polisi Dodoma, katika mpambano  unaotarajiwa kufanyika leo kwenye Uwanja wa Jamhuri mjini hapa.

Pambano hilo limeandaliwa maalumu ikiwa ni sehemu ya kuiandaa Simba katika mchezo wa Ligi Kuu Bara dhidi ya Ruvu Shooting utakaochezwa Jumatano ya wiki ijayo jijini Dar es Salaam.

Mashabiki wa mjini hapa hawajaiona Simba tangu msimu wa 2011-2012 walipocheza mchezo wa mwisho wa ligi.

Wakati Simba watakua wakiutumia mchezo huo kujiandaa na mchezo wa Ligi Kuu Bara, wapinzani wao Polisi Dodoma watautumia kwa ajili ya maandalizi ya Ligi Daraja la Kwanza mchezo wa ufunguzi dhidi ya Panone ya Kilimanjaro, Septemba 24 mwaka huu.

Akizungumza na waandishi wa habari jana, kocha msaidizi wa Simba, Jackson Mayanja, alisema mchezo huo ni kwa ajili ya kuwapima wachezaji wao.

Wachezaji wa kimataifa atakaowatumia katika mchezo huo ni Vincent Angban na Fredrick Blagnon wote kutoka Ivory Coast, Method Mwanjali kutoka Zimbabwe na Wakongo, Besala Janvier Bukungu na Mousa Ndusha.

Mayanja alisema wachezaji waliopo na timu za taifa ni Laudit Mavugo (Burundi) na Jjuuko Murshid (Uganda), wakati Shiza Kichuya, Ibrahim Ajib, Mohamed Ibrahim, Mohammed Hussein ‘Tshabalala na Jonas Mkude wapo kwenye kikosi cha Taifa Stars.

Alisema atautumia mchezo huo kuwaangalia wachezaji wake wapya pamoja na kutengeneza kombinesheni ya uchezaji kutokana na wachezaji wengi kuwa wapya.

“Natengeneza ‘combination’ ya timu, sasa huwezi kuitengeneza sehemu nyingine zaidi ya michezo ya kirafiki kama hii, niwaombe mashabiki waje waone burudani,” alisema Mayanja.

Kocha wa timu ya Polisi Dodoma, Paul Domishian, kwa upande wake alisema mchezo huo una hadhi na unaendana na malengo yao ya kucheza Ligi Kuu Bara hivyo watautumia kutengeneza timu yake.