Kilichomuondoa Boban Mbeya City hiki hapa

LICHA ya uwezo wa kufunga na kutengeneza mabao mengi, kiungo mkongwe nchini, Haruna Moshi ‘Boban’, alitemwa na Mbeya City mwishoni mwa usajili wa msimu huu, lakini kocha amefunguka nje ndani sababu za kumuacha.

Boban alikuwa mhimili mkuu ndani ya kikosi cha Mbeya City msimu uliopita akicheza kama kiungo na wakati mwingine kama mshambuliaji wa pili, lakini hiyo haikusaidia kupewa mkataba mwingine.

Kocha Kinnah Phiri raia wa Malawi amelielezea Championi Jumatatu sababu kuu tatu zilizomnyima Boban mkataba mwingine kwa kile alichosema ni jazba, umri na falsafa ya kiufundi.

“Kweli Boban alitusaidia lakini naye kama binadamu alikuwa na udhaifu wake. Sawa, alikuwa na nidhamu lakini hakujua kuitumia. Ni mtu wa jazba aliyependa kulipiza kwa hasira nyingi, jambo ambalo lilikuwa likileta sura tofauti. Pia pamoja na kiwango kizuri, Boban alikuwa hajitumi kama wakongwe wenzake kama Redondo (Ramadhan Chombo).

“Lakini pia, tayari umri ulikuwa umekwenda na kutokana na falsafa yangu ya kupendelea zaidi damu changa na wakongwe wachache sana kwenye kikosi changu, ndiyo maana akawa mmoja wa wale walioachwa,” alisema Phiri.

Msimu huu Phiri anasema amebakiza wakongwe wanne tu; Juma Kaseja, Redondo, Andrew Chaima na Hassan Mwasapili.