Kandanda Day kuchangia madawati

TAMASHA la Kandanda maarufu kama ‘Kandanda Day’, linatarajia kufanyika Oktoba 15, mwaka huu katika Kiwanja cha Jakaya Kikwete Park (zamani Kidongo Chekundu).

Katika tamasha la mwaka huu, kauli mbiu itakuwa ni ‘Mpira na Dawati’ kwa maana ya tamasha hilo kutumika  kukusanya fedha kwa ajili ya kununua madawati yatakayogawiwa kwa shule mbalimbali nchini.

Mratibu wa tamasha hilo, Mohamed Mkangara, alisema mwaka huu wameamua kuja na kauli mbiu hiyo, ili kuunga mkono kampeni inayoendelea ya serikali kuhusu uchangiwaji wa madawati kwa shule za msingi na sekondari.

“Umekuwa ni utaratibu wetu kila mwaka huu,kuja na kauli mbiu ambayo itahusisha soka na jambo ambalo moja kwa moja linaihusu jamii, kwahiyo tumeona kwa kutumia soka, tunaweza kuisaidia jamii yetu kwa urahisi,” alisema Mkangara.

Tamasha hilo linatarajia kushirikisha timu mbalimbali zilizoalikwa, ukiacha timu wenyeji Time Dizo Moja na Timu Ismail. Pia siku hiyo kutakuwa na burudani mbalimbali na michezo ya kuvuta kamba kwa washiriki.