Yanga kwa muda mrefu imekuwa ikimtumia Bossou ambaye ni nahodha msaidizi kama beki kisiki, lakini mipango hiyo inaonekana kugonga mwamba wiki hii.
Juzi Bossou alikuwa na kikao kizito na uongozi wa Taifa lake kilichopelekea kuchelewa kurejea nchini kujiunga na kikosi cha timu ya Yanga ambacho kimeelekea mkoani Mtwara.
Yanga imeondoka jana asubuhi kuelekea mkoani humo kwa ajili ya mechi dhidi ya Ndanda FC, mchezo unaochezwa leo katika Uwanja wa Nangwanda Sijaona.
Bossou aling’ara kwenye kikosi chake mwishoni mwa wiki baada ya kufunga bao moja katika ushindi wa mabao 5-0 walioupata dhidi ya Djibouti kuwania kufuzu kwa fainali za Kombe la Mataifa ya Afrika mwakani nchini Gabon.
Katika mechi hiyo iliyopigwa Uwanja wa Kegue, mjini Lome, mabao ya The Sparrow Hawks yalifungwa na beki wa Yanga ya Tanzania, Vincent Bossou, Mathieu Dossevi, Fo-Doh Laba na Komlan Agbegniadan mawili na Togo inamaliza nafasi ya pili kwenye Kundi A hivyo kufuzu Afcon ya kwanza tangu mwaka 2013, baada ya Tunisia iliyoifunga Liberia 4-1 na kumaliza kileleni.
Akizungumza na DIMBA Jumatano jana kwa simu akiwa nchini Togo, Bossou alisema amefurahi kuisaidia timu yake ya taifa kuweza kufuzu kwa fainali hizo za Afcon, lakini hajui atarejea lini hapa nchini kujiunga na Yanga.
“Nafurahi kuona timu yangu imeingia moja kwa moja katika michuano hiyo, ni jambo la kujivunia, hata hivyo, sidhani kama nitawahi mechi za wiki hii kwa vile bado tuna vikao na viongozi wangu,” alisema.
Hii inakuwa mara ya kwanza kwa Togo kupata nafasi ya kushiriki Afcon tangu mwaka 2013 ilipofanikiwa kufika hatua ya robo fainali.
Post a Comment