KOCHA wa Simba, Joseph Omog, ameshindwa kuficha hisia zake
juu ya winga wa kulia wa timu yake, Shiza Kichuya na kuamua kuanika siri za
staa huyo ambazo zinamkuna sana yeye kama mwalimu.
Akimzungumzia Kichuya ambaye amesajiliwa na Simba msimu huu
akitokea kwenye klabu ya Mtibwa Sugar, Omog alisema Kichuya ni moja ya
wachezaji tegemeo kikosini kwake na anaamini atakuja kufanya makubwa sana siku
za usoni.
“Kichuya ni mchezaji mzuri sana zaidi ya watu
wanavyomfikiria na baada ya kumuona kwenye mechi hizi chache alizocheza ni
dhahiri kuwa ana uwezo wa juu sana na anazunguka uwanja mzima,” alisema Omog.
Kocha huyo alienda mbali zaidi na kutaja mambo yanayomkuna
kuhusu ubora wa Kichuya, alisema: “Kichuya ana kasi akitokea pembeni, krosi
zake ni za uhakika, anakaba, anafunga na kutoa pasi za mwisho.
“Kwa kifupi Kichuya ni aina ya mchezaji anayeweza kucheza
vema na mshambuliaji wa aina yoyote, atawasumbua sana mabeki msimu huu, miguu
yake yote miwili inapiga mashuti ya nguvu, naamini kadiri nikiendelea kukaa
naye atakuja kuwa mchezaji wa kiwango cha juu sana.”
Kichuya tangu awasili Simba amekuwa akitajwa kama moja kati
ya usajili bora zaidi ndani ya klabu hiyo na ndiyo maana ameweza kuingia haraka
kwenye mfumo wa Omog.
Post a Comment