Manji awaondoa hofu wachezaji kwa kuwaambia bado kiongozi Yanga

WAKATI Yanga kesho Jumapili ikitarajiwa kushuka uwanjani 

kupambana na African Lyon katika mchezo wake wa kwanza 

wa Ligi Kuu Bara msimu huu, jana mwenyekiti wa klabu hiyo,

 Yusuf Manji alifanya kikao kizito cha dakika 270 na wachezaji

 wa kikosi hicho.

Kikao hicho maalum kilifanyika kwenye ofisi za tajiri huyo 

zilizopo jengo Quality Plaza jijini Dar. Kikao hicho kilianza 

saa 2:00 asubuhi hadi saa 6:30 Mchana.

Habari za kuaminika kutoka ndani ya Yanga zimedai kuwa, 

kikao hicho kilikuwa maalumu  kwa wachezaji pamoja na 

viongozi wa benchi lao la ufundi ambapo walipata kujadili

 mambo mbalimbali yanayowahusu, likiwemo suala la ushiriki wao kwenye Ligi Kuu Bara msimu huu ambao wanakabiliwa na 

changamoto kubwa ya kutetea ubingwa wao.

“Ni kweli kabisa wachezaji wetu walikuwa na kikao na 

mwenyekiti kwa ajili ya kuzungumza mambo mbalimbali 

yanayowahusu lakini pia ushiriki wao katika michuano ya ligi kuu.

“Kama unavyojua siku chache zilizopita walipatwa na 

hofu kubwa baada ya taarifa kuwa mwenyekiti anataka 

kuachana na timu kutokana na kuchoshwa na matusi ambayo

 amekuwa akikumbana nayo tangu siku aliyotangaza kutaka

 kuikodi timu yetu.

“Kutokana na hali hiyo, pia ametumia mkutano huo kuwaondoa 

hofu hiyo waliyokuwa nayo wachezaji wetu na amewataka 

wapige kazi kwani ushindani msimu huu ni mkubwa na yeye

 yupo nao bega kwa bega kuhakikisha wanawatimizia mahitaji

 yao yote, ikiwa ni pamoja na stahiki zao wanazostahili kupewa

 kulingana na makubaliano yao,” kilisema chanzo hicho cha 

habari na kuongeza:

“Mambo sasa yamekaa sawa, hivyo ile hofu ya kufanya vibaya 

msimu huu ikiwa ni pamoja na mchezo wetu wa kwanza dhidi 

ya African Lyon imeondoka, hivyo Wanayanga tushikamane 

pamoja ili kuhakikisha hatuvurugani tena.”

Alipotafutwa Katibu Mkuu wa Yanga, Baraka Deusdedit ili aweze kuzungumzia suala hilo, hakuweza kupatikana kufuatia simu yake ya mkononi kuita tu bila ya kupokelewa na hata alipotumiwa ujumbe 

wa maandishi hakuweza kujibu.

Hata hivyo, walipoulizwa kuhusiana na suala hilo, baadhi ya 

wachezaji wa timu hiyo ambao waliomba kutotajwa majina yao

 gazetini walisema: “Taarifa hizo ni za kweli kabisa kwani ilikuwa tukutana naye jana (juzi) lakini baadaye tulipewa taarifa kuwa 

amechoka na leo (jana) ndiyo tumekutana naye.”