Serengeti yaua, yabakiza hatua moja

KIKOSI cha timu ya taifa ya Serengeti Boys kimefanikiwa kutinga hatua inayofuata kwenye michuano ya kuwania kufuzu kucheza Kombe la Afrika kwa Vijana baada yta kuifunga Afrika Kusini mabao 2-0.

Katika mchezo wa awali uliopigwa huko Afrika Kusini, timu hizo zilitoka sare ya bao 1-1 kabla ya leo kurudiana kwenye Uwanja wa Chamazi, Dar hivyo matokeo ya jumla kuwa 3-1.

Serengeti ambayo ilionyesha soka zuri ilifanikiwa kuandika bao la kwanza dakika ya 33 kupitia kwa Mohamed Rashid Abdallah kisha Muhsin Makame katika dakika ya 85 bao ambalo lilionekana kuwamaliza nguvu wageni hao.

Wizara ya Habari, Utamaduni, Sanaa na Michezo , Nape Nnauye alikuwepo uwanjani hapo kuwapa sapoti vijana hao ambao pia hawakumuangusha.

Katika mchezo huo, mchezaji wa Serengeti Boys, Ally Ng’anzi alipata kadi nyekundu katika hatua za mwisho kuelekea kukamilika kwa kipindi cha kwanza lakini hiyo haikupunguza nguvu ya Watanzania hao.

Serengeti sasa itakutana na kati ya Namibia au Congo Brazzavile na ikishinda itatinga fainali ya michuano hiyo itakayofanyika mwakani nchini Madagascar.