Mayanja aishangaa Yanga kufungwa na Azam

KOCHA Msaidizi wa Simba, Jackson Mayanja, amekiri kuwa aliweka asilimia zote kuwa Yanga ingeifunga Azam katika mechi yao ya juzi ya Ngao ya Jamii lakini ameshangazwa na kilichotokea, Azam kuifunga Yanga.

Azam iliifunga Yanga kwa mikwaju ya penalti 4-1 baada ya matokeo ya sare ya 2-2 katika dakika 90 za mchezo huo uliopigwa kwenye Uwanja wa Taifa, Dar.

“Sikutegemea kama Yanga ingefungwa na Azam, niliweka asilimia kubwa za Yanga kuibuka na ushindi maana imekaa kwa pamoja muda mrefu tangu ligi imeisha, hakuna mabadiliko makubwa na wachezaji wamekuwa na uzoefu mkubwa sasa zaidi ya wachezaji wa Azam kutokana na mechi zao za kimataifa.

“Hata mpira wa uwanjani Yanga ilionekana kuwazidi Azam kwa kiwango kikubwa lakini mwisho matokeo yamekuwa kama yalivyoonekana, lakini hiyo ndiyo hali halisi ya mpira, nafikiri kuna cha kujifunza hapo,” alisema Mayanja.