WAKATI uongozi
wa Simba ukidai kuwa hadi hivi sasa haujui hatima ya ujio wa mshambuliaji
Mrundi, Laudit Mavugo, meneja wa mchezaji huyo na mmiliki wa Klabu ya Vital’O
ya Burundi, Benjamin Bikolimana amefunguka kuwa Mavugo ametimkia nchini
Ufaransa katika mapumziko.
Mshambuliaji
huyo ambaye alitarajiwa kutua leo Jumatatu kwa ajili ya kuanza maandalizi ya
msimu mpya wa Ligi Kuu Bara chini ya Kocha wa Simba, Mcameroon, Joseph Omog,
dalili zinaonyesha hatatua, kwani imeshangaza badala ya kuja kazini amekwenda
kula bata Ufaransa.
Ikumbukwe
kuwa, mwaka jana Simba ilimpa Mavugo Sh milioni 36 kama ada ya usajili lakini
timu yake ya Vital’O ikakataa ikisema nayo ilipwe kwani ilikuwa na mkataba na
straika huyo.
Akizungumza
moja kwa moja kutoka nchini Burundi, Bikolimana ambaye pia ni meneja wa
mchezaji huyo, alisema kuwa kwa sasa hajui chochote kuhusu Simba zaidi ya
Mavugo kwenda zake nchini Ufaransa katika mapumziko akiwa na familia yake.
“Nina
muda sijazungumza na Mavugo na wala hatujazungumza kuhusiana na suala la Simba
kwa sababu nakumbuka hiyo ilikuwa mwaka jana na ilishindikana kutokana na
kushindwa kufikia makubaliano ya kuwauzia mchezaji huyo.
“Ninavyojua
ni kwamba, hayupo hapa nchini, amekwenda zake katika mapumziko huko Ufaransa na
sijui lini atarejea hapa Bujumbura, sasa unanieleza anakuja Tanzania kuichezea
Simba mimi hilo siwezi kuliongelea kwani ni vyema akatafutwa mwenyewe awaeleze
kuhusu hilo,” alisema Bikolimana.
Rais wa
Simba, Evans Aveva, hivi karibuni alilalamika kuwa wameshampa mchezaji huyo
fedha zote zinazotakiwa lakini anashangaa kwa nini haji nchini kutumika.
Post a Comment