UMEBAKI muda mchache tu kabla ya
sintofahamu ya mfanyabiashara maarufu, Mohammed Dewji (Mo), kukabidhiwa au
kutokabidhiwa kuwekwa wazi baada ya mkutano mkuu wa klabu ya Simba ya jijini
Dar es Salaam kufanyika Jumapili.
Wanachama wa klabu ya Simba
wanatarajia kufanya mkutano wao mkuu Jumapili ya Mei 31, ambapo licha ya mambo
mengi kutarajiwa kujadiliwa, suala la Mo kupewa timu linatarajiwa kutikisa.
Mo alitangaza kutaka kununua hisa
zinazofikia asilimia (51%) ambapo angewekeza kiasi cha shilingi milioni 20 na
baada ya kauli hiyo yaliibuka makundi mawili, moja likiunga mkono bilionea huyo
apewe timu na lingine likionyesha wasiwasi.
Hata hivyo, kundi kubwa ndilo ambalo
limekuwa likionyesha kumuunga mkono mfanyabiashara huyo apewe timu kwa madai
kuwa ataisaidia klabu hiyo hasa kuwalipa mishahara wachezaji na benchi la
ufundi na pia kufanya usajili wenye tija.
Moja ya sababu zinazowafanya
mashabiki hao walio wengi kumuunga mkono Mo, ni kutokana na timu hiyo kukosa
ubingwa kwa misimu minne mfululizo na mara kadhaa baadhi ya wachezaji
wakilalamika kucheleweshewa mishahara yao.
Licha ya kwamba Mo alisema anaitaka
Simba na hata kufikia kipindi akawapa muda wawe wamempa jibu, lakini mara
kadhaa viongozi wa Wekundu hao wa Msimbazi walinukuliwa wakisema mfanyabiashara
huyo hakufika mezani kwao kulizungumzia suala hilo.
Tangu Mo kutangaza kutaka kuwekeza
katika klabu hiyo hapajakuwa na mkutano wowote na sasa jambo hilo linatarajiwa
kuibuka upya mwishoni mwa wiki hii kwenye mkutano huo kwani baadhi ya mashabiki
wamepania kupata jibu.
Wakati mkutano huo ukitarajiwa kuvuta
hisia za wengi hasa juu ya jambo hilo, DIMBA Jumatano lilifanya mahojiano na
baadhi ya viongozi wa matawi ya Simba juu ya mfanyabiashara huyo kuachiwa timu
ama la.
Mwenyekiti wa Nyayo za Simba Mabibo,
Ramadhani Pazi, alisema huu ni muda mwafaka Mo kukabidhiwa timu kwani mashabiki
wanachokitaka ni furaha na kwa sasa duniani kote timu zimekuwa zikipata sapoti
kubwa kutoka kwa wafanyabiashara.
“Mimi nimekuwa Simba tangu wakati huo
ikiitwa Sunderland mpaka sasa bado nipo, kwa mawazo yangu huu ni muda mwafaka timu
kukabidhiwa kwa mtu yeyote ambaye anaweza kuifanyia makubwa.
“Duniani kote tumeshuhudia hata zile
timu kubwa zikipata sapoti kutoka kwa wafanyabiashara kama Dewji sasa ikiwa
amekidhi vigezo na apewe hii timu, mimi sioni shida,” alisema kauli ambayo pia
ilikuwa sawa na ile ya Katibu Mkuu wa tawi la Ngome Kongwe Tabata.
Kwa upande wake Katibu Mkuu wa tawi
la Vuvuzela, Hamis Mkoma, alisema kwa sasa suala la Mo linatakiwa liwekwe kando
kwanza mpaka pale wanachama watakapopewa elimu ya kutosha huku Katibu Mkuu wa
tawi la Ubungo Terminal (UBT), Jastine Mwakitalima, akisema hapingani na wazo
la Mo kupewa timu ila angalau angeonyesha moyo wa kutoa fedha wakati timu hiyo
ilipokuwa katika hali ngumu ili kuthibitisha kuwa ana mapenzi ya dhati.
Post a Comment