SIMBA wameingia anga za Ulaya ambao
kwa sasa wanatarajia kuuza hisa kwa wanachama ili kubadilisha mfumo wa
uendeshaji wa klabu hiyo kongwe hapa nchini.
Klabu kama Arsenal inayoshiriki Ligi
Kuu ya England, imekuwa ikijiendesha kwa
mfumo wa kununua hisa ambapo, Stan Kroenke, anaongoza kwa hisa nyingi na
mwenye sauti kubwa ndani ya klabu hiyo.
Wanachama wa klabu hiyo, wanatarajiwa
kuridhia mfumo mpya wa uendeshaji wa klabu yao katika mkutano mkuu unaotarajia
kufanyika Jumapili jijini Dar es Salaam.
Baadhi ya wanachama wa klabu hiyo,
wameonyesha nia ya kununua hisa akiwamo bilionia, Mohammed Dewji ‘Mo’, ambaye
yuko tayari kununua asilimia 51 kwa thamani ya shilingi bilioni 20.
Rais wa Simba, Evans Aveva na Kamati
yake ya utendaji ya klabu hiyo, iliteua kamati ya watu wanne ili kuangalia na
kujadili vyanzo vya mapato vya kuweza kusaidia timu yao, ambayo imeleta
mapendekezo ya kubadilishwa kwa mfumo wa uendeshaji ili kuifanya Simba
ijiendeshe bila kutegemea fedha za mtu kutoka mfukoni.
Katibu wa Kamati hiyo, Mulamu
Ng’hambi, alisema walipewa jukumu la kuandaa ripoti ya jinsi hisa itakavyokuwa
ikiuzwa kwa wanachama ili waweze kujadili kwenye mkutano wao.
Ng’hambi alisema wametumia miezi
miwili kuweka utaratibu wa kuuza hisa za klabu hiyo baada ya kugundua njia
pekee ya kukwamua klabu hiyo kiuchumi ni kubadili mfumo wa uendeshaji.
Alisema kamati hiyo iliyokuwa chini
ya mwenyekiti wake, Azizi Kefeli ambaye ni mhasibu mkuu wa Serikali ikiwa na
wajumbe wawili, Selemani Omari na Ali Sulu, tayari imeandaa ripoti itakayopelekwa kwa wanachama ili kuridhia
mabadiliko hayo.
Ng’hambi alisema kamati yao
iliangalia mfumo wa uendeshaji wa klabu hiyo
hasa baada ya kushindwa kufikia malengo yao kwenye Ligi ya Vodacom na
michuano mingine na kugundua kwamba tatizo kubwa lilikuwa ni fedha lakini pia
mfumo wa uendeshaji wa timu unainyima klabu hiyo kukua kiuchumi.
“Watu wengi wanawalaumu viongozi si
kwamba wanashindwa ila wanakwama kwa ajili ya fedha, Simba hawawezi kununua
wachezaji wenye viwango vya juu kutokana na mapato yake na vyanzo vyake kuwa ni
vichache sana tofauti na timu nyingine,” alisema.
Alisema baada ya kufanya utafiti
walibaini sasa ni wakati wa kuwaruhusu watu wengi zaidi kuwekeza fedha zao
Simba ikimaanisha wanunue hisa.
Alisema mfumo huo wa kununua hisa
hautamwondoa mwanachama yeyote katika klabu hiyo kwani kwa sasa utawapa
wanachama nafasi ya kuwa wamiliki wa timu kwa kununua hisa.
“Tumeona ni bora tutengeneze mfumo
ambao watu wengi zaidi watawekeza fedha zao na wanunue hisa na fedha hizo
zitaweza kutumika kwa manufaa mbalimbali ambapo mtu ambaye atakuwa na hisa nyingi
zaidi ndiye atakuwa na sauti zaidi kuliko hizi sasa kila mmoja anaweza kusema
na kuamua jambo ambalo linaiyumbisha timu hii,” alisema.
Alisema mtu ambaye atanunua hisa
atapewa cheti maalumu cha kumtambua kama mmoja wa wamiliki wa Simba hivyo kila
mwanachama anaweza kununua hisa kulingana na uwezo wake.
Ng’hambi alitoa mfano wa klabu ya
Arsenal inayojiendesha kwa mfumo huo wa
kununua hisa, ambapo wanahisa wengine ni Alisher Usmonov na Forhad Moshiri
ambao wote wana sauti kwenye klabu hiyo.
Alisema kikubwa wanachofanya kwa sasa
ni kusambaza elimu kwa wanachama wao ili kuelewa lengo la mfumo huo na kuondoa
zile taarifa za watu kupotosha mpango huo.
Ng’hambi alisema kamati hiyo ilifanya
mazungumzo na mfanyabiashara maarufu, Mo na amewaambia hana shida ya kuwa
mwenyekiti bali ni mwekezaji tu.
“Sisi tulimfuata Mo na kuzungumza
naye, alisema yeye hana shida na cheo
chochote Simba na anataka kuwa mwekezaji hivyo tunadhani mfumo huu ndio utakuwa
suluhisho kwa klabu hii,” alisema.
Alisema wanatarajia kuwasilisha
taarifa yao kwa Kamati ya Utendaji Simba na kupendekeza hoja kwenye Mkutano
Mkuu utakaofanyika Julai 31, mwaka huu.
N’ghambi alisema mbali na Mo
kujitokeza kununua hisa kuna matajiri wengine kama Azim Dewji na wengineo.
“Yaani kuna watu wengi sana ambao
wameonyesha nia ya kuridhika na mfumo huu siwezi kuwataja kwa sasa ila ni
wengi, mfumo huu utaweza kuisaidia Simba,” alisema.
CHANZO: DIMBA
Post a Comment