Simba yatoa vielelezo vya Kessy

SIKU chache baada ya Simba kutakiwa vithibitisho vya kumlipa mishahara beki wake wa zamani, Hassan Ramadhani ‘Kessy’, Wekundu hao wa Msimbazi wameibuka na kusema wana kila karatasi iliyotakiwa kwenye sakata hilo.

Simba iliombwa uthibitisho huo kufuatia hoja iliyowasilishwa na Mwanasheria wa Yanga, Alex Mgongolwa, katika kikao cha Kamati ya Sheria na Hadhi za Wachezaji, kwamba Simba haina uhalali wa madai yoyote dhidi ya Kessy kwa sababu haikumlipa mshahara kwa miezi mitatu.

Mwenyekiti wa Kamati ya Usajili, Zacharia Hans Pope, alisema wana uthibitisho wote uliotakiwa na kamati hiyo itakayokaa wikiendi hii.

Alipoulizwa kama wana uthibitisho na vielelezo, Hans Pope alijibu kifupi sana: “Yap vipo, Yanga hawana hoja wanatapatapa tu.”

Katika kikao cha awali kilichofanyika Makao Makuu ya Shirikisho la Soka Tanzania (TFF), Yanga walidai kwamba Simba hawakumlipa mchezaji huyo kwa miezi mitatu kuelekea mwisho wa mkataba wake na kwa mujibu wa sheria, hawana haki ya madai yoyote dhidi yake.

Yanga waliiomba Kamati ipokee vithibitisho vya vielelezo vya kupelekwa mishahara ya Kessy kwenye akaunti yake ya benki na si vinginevyo, kwa kuwa wana wasiwasi wapinzani wao wanaweza kufoji nakala za kumlipa mkononi.

Simba inalalamikia klabu ya Yanga kumsajili beki Kessy akiwa hajamaliza mkataba wake Msimbazi na kwa sababu hiyo inataka kulipwa Sh milioni 200 ambayo ni punguzo kutoka bilioni 1.2 walizozitaka awali.