Bossou azuiwa Yanga, ataja siku atakayoondoka

BEKI wa Yanga, Mtogo, Vincent Bossou, amefunguka kwamba amerudi nchini kumalizia mkataba wake wa miezi sita, kabla ya kuondoka moja kwa moja.

Anadai kuwa awali aliomba kuununua mkataba huo lakini viongozi wa Yanga wakamuwekea ngumu kwa kumgomea na kumtaka aje amalizane nao ndipo aondoke.

Bossou ni miongoni mwa nyota wa kimataifa ambao mikataba yao inaelekea ukingoni akiwa sambamba na Donald Ngoma, Thabani Kamusoko na Haruna Niyonzima ambapo tayari yeye ameweka bayana kwamba hataendelea kuichezea timu hiyo baada ya kupata timu nje ya nchi.

Beki huyo mwezi Januari, mwakani anatarajia kushiriki Kombe la Mataifa Afrika (Afcon) litakalofanyika Gabon, ameliambia Championi Ijumaa, kuwa amerejea siyo kwamba amefeli majaribio nchini Vietnam kama inavyodaiwa bali anaheshimu mkataba uliobakia na timu hiyo ambapo amepanga kuumaliza kabisa ili awe mchezaji huru na aondoke bila ya kukorofishana na mtu.

“Sijafeli majaribio Vietnam kama watu wanavyosema, ikumbukwe kwamba mimi nimecheza kule miaka minne mfululilizo kabla ya kuja Yanga, sasa naendaje kufanya majaribio?

“Nimerudi Yanga kwa ajili ya kumalizana na timu yangu kwa sababu viongozi hawakutaka niondoke kwa kipindi sasa kutokana na msaada ambao nimeuonyesha kwenye mzunguko wa kwanza na kwenye mechi za kimataifa.

“Niliwaomba viongozi niweze kununua sehemu ya mkataba uliobakia na nilikuwa tayari kuwalipa Yanga kiasi chochote ambacho wangehitaji, lakini wakagoma na kunitaka nije na ndiyo nimerejea, nitacheza hadi pale mkataba wangu utakapoisha kwa sababu naheshimu mkataba nilionao sasa lakini ukifika mwisho tu hawataweza kunizuia kwa njia yoyote ile,” alisema Bossou.