Ngassa afunguka ishu ya kutua Mbeya City

KIUNGO wa Fanja, Mrisho Ngassa ameibuka na kukana kusaini kwenye kikosi cha Mbeya City.

Ngassa ambaye hivi karibuni alijiunga na Fanja ya Oman, yupo nchini kwa sasa kwa madai kuwa anauguza goti ambalo aliumia wakati akiitumikia timu yake hiyo.

Juzi picha ya Ofisa Habari wa Mbeya City, Dismas Ten akiwa na Ngassa katika moja ya hoteli maarufu zilizua mjadala mkubwa kuwa nyota huyo wa zamani wa Yanga, Azam na Simba amemwaga wino Mbeya City.

Picha hiyo iliwekwa kwenye Instagram na kuisindikiza na maneno yaliyosomeka; “Mnapokamilisha jambo kutakiana heri ndio uungwana. Kila la heri anko @mrisho_ngasa_17.”

Ngasaa ameiambia spotiripota kuwa hajasaini Mbeya City isipokuwa picha inayoonekana aliamua kupiga tu kama picha zingine na kwamba yeye anamilikiwa na Fanja.

"Siyo kweli, mimi sijasaini huko na hata sijazungumza nao kabisa kuhusu usajili,” alisema Ngassa.