NA SELEMAN SHINENI, BINGWA
YANGA ndivyo kama milivyosikia safari yao ya kuusaka ufalme
wa Kombe la Shirikisho Afrika ilihitimishwa rasmi juzi kwa kile kichapo cha
mabao 3-1 kutoka kwa TP Mazembe ya Jamhuri ya Kidemokrasia ya Congo (DRC).
Licha ya kulipokea Kundi A kwa furaha kubwa, lakini safari
yao ya kuliteka soka la bara la Afrika ilihitimishwa kwa wao kuburuza mkia wa
kundi ambalo waliamini lilikuwa rahisi kwao kutokana na kutokuwa na timu nyingi
za Kiarabu.
Wakiwa pamoja na timu za Mo Bejaia ya Algeria na Medeama ya
Ghana, Yanga walijiaminisha kuwa watatinga nusu fainali ya Kombe la Shirikisho
wakiwa sambamba na TP Mazembe.
Lakini, siku zote Waswahili wanasema ‘mipango si matumizi’
kwani katika mechi sita za Kundi A, Yanga walifanikiwa kuondoka na pointi nne
tu, hii ni kutokana na kushinda mechi moja, kutoka sare moja na kufungwa
nyingine nne.
Wakati Yanga wakiambulia pointi nne tu, Medeama SC ambayo
wengi waliidharau ndiyo imemaliza katika nafasi ya pili ya Kundi A ikiwa na
pointi nane na kusonga mbele sambamba na TP Mazembe walioongoza baada ya kuwa
na pointi 13.
Medeama ilimaliza pointi sawa na Bejaia ambayo ilishika
nafasi ya tatu, lakini ilibebwa na idadi kubwa ya mabao ya kufunga iliyokuwa
nayo na kuwaacha Yanga wakiburuza mkia wakiwa na pointi zao nne tu.
Baada ya hatua ya makundi ya Kombe la Shirikisho kuisha na
Yanga kuyaaga rasmi mashindano hayo, BINGWA linakuleta makosa ambayo miamba
hiyo ya Jangwani iliyafanya na kujikuta ikishindwa kufika nusu fainali ya
mashindano hayo.
Mechi za nyumbani
Siri kubwa ya kufanya vizuri kwenye michuano ya Afrika hasa
hatua ya makundi ni kujua kuzicheza mechi zako za nyumbani, kwa sababu kati ya
mechi sita za hatua hii tatu unacheza katika uwanja wako wa nyumbani hivyo kama
ukishinda zote unakuwa na uhakika wa pointi tisa ambazo zinatosha kabisa
kukuvusha kwenye kundi lako.
Lakini kwa Yanga hali haikuwa hivyo na ilishindwa kucheza
mechi zake za Uwanja wa Taifa na kati ya pointi tisa ambazo ilitakiwa kuzivuna
nyumbani iliambulia pointi nne na kupoteza nyingine tano (hii ni baada ya
kushinda mechi moja, kutoka sare moja na kufungwa moja).
Wakati Yanga wakipata pointi nne nyumbani wapinzani wao, TP
Mazembe kati ya pointi 13 walizovuna kwenye Kundi A, tisa wamepata nyumbani
kutokana na kushinda mechi zao zote za Lubumbashi, Medeama wao kati ya pointi
nane walizopata saba wamevuna nyumbani baada ya kushinda mechi mbili na kutoka
sare moja katika mechi zao tatu walizocheza mjini Takoradi.
Mo Bejaia pia kwenye pointi nane walizovuna saba wamevuna nyumbani
kwao na kupoteza pointi mbili tu katika ardhi ya mji wa Bejaia, huu ni ushahidi
tosha kuwa wapinzani wa Yanga walijizatiti kupata matokeo mazuri nyumbani
wakati vijana wa Hans van der Pluijm, wakishindwa kabisa kuutumia Uwanja wa
Taifa.
Kupoteza nafasi
Kama umefuatilia mechi za Yanga katika hatua ya makundi ya
Kombe la Shirikisho utakuwa umegundua kuwa vijana hawa wa Pluijm, walikuwa na
tatizo la kushindwa kutumia nafasi walizozitengeneza kwenye mechi zao zote.
Karibu katika mechi zote za Yanga washumbuliaji wake
walipata nafasi nyingi za kucheka na nyavu lakini walishindwa kuzitumia na
mwisho wa siku timu ilipoteza mechi au kuambulia sare kitu ambacho kimekuja
kuwaponza kwenye matokeo ya mwisho ya Kundi A na kuishia kuburuza mkia.
Kudharau kundi
Baada ya kuzikwepa timu za Uarabuni zilizokuwa na majina
makubwa, Yanga wakadharau kundi lao la A wakiamini kuwa timu ambayo ilikuwa na
uwezo wa kuwapa shida ilikuwa ni TP Mazembe pekee.
Dharau hii kwa kiasi kikubwa ilisababishwa na historia za
kawaida za timu za Medeama na Mo Bejaia, hivyo timu kuna wakati ilijiandaa
ikiwa na matokeo yake kichwani kitu ambacho kilikuja kuwatokea puani na
kujikuta wakiteswa na miamba hiyo ya Ghana na Algeria kwa vipindi tofauti na
kuishia kubeba wengine kwenye kundi lao.
Safu ya ulinzi
Licha ya kutajwa kama timu yenye safu bora ya ulinzi kwenye
soka la Tanzania kwa sasa, Yanga imetupwa nje ya michuano hii ya Afrika
kutokana na eneo hilo muhimu katika timu kufanya makosa ya aina ile ile mara
kwa mara na kuiponza timu.
Yanga ambayo ndiyo imefungwa mabao mengi zaidi kwenye Kundi
A ikiruhusu mabao tisa kwenye mechi sita, katika mechi zake nyingi ilikuwa
ikiruhusu mabao ya aina ile ile ambayo mara kadhaa yalitokana na mipira
iliyokufa, kitu ambacho kiliishia kuifanya timu ipoteze hata michezo ambayo
ingeweza kupata sare na kuvuna pointi japo moja au kushinda kabisa.
Nidhamu
Kama kuna kitu kocha wa Yanga anatakiwa kukifanyia kazi
wakati timu yake itakapoiwakilisha Tanzania kwenye michuano ya Afrika msimu
ujao ni nidhamu.
Karibu katika kila mechi ya Yanga kwenye michuano ya Afrika
msimu huu ilimkosa mchezaji wake muhimu mmoja au wawili kutokana na adhabu ya
kadi mbili za njano au nyekundu.
Kitendo hiki kiliiumiza timu kwa sababu kila siku kocha
alilazimika kutafuta mtu wa kuziba nafasi ambayo ilibaki wazi kutokana na
kumkosa mchezaji wake muhimu na wakati mwingine mapengo hayo hayakuzibika
ipasavyo na timu ikachezea kichapo.
Mechi za ugenini
Katika Kundi A lote ni Yanga pekee ambayo ilishindwa kuvuna
japo pointi moja ugenini, wakati TP Mazembe kavuna nne, Medeama SC moja na Mo
Bejaia moja kitu ambacho angalau kinathibitisha kuwa wapinzani wa miamba hiyo
ya Jangwani walikuwa na mipango ya ugenini pia.
Siku zote kwenye mechi za makundi mbali na kushinda mechi za
nyumbani timu inatakiwa kujipanga angalau kuambulia sare au hata ushindi
mwembamba ugenini ili kujiweka vizuri kusonga mbele, pili msimu wa kundi
ukiwekwa baada ya mechi za mwisho, lakini Yanga hawakuwa na hilo ndiyo maana
pointi zake nne zote wamepata nyumbani tu.
Post a Comment