Jose Mourinho kusaini mkataba Juni 30

KOCHA wa zamani wa Chelsea, Jose Mourinho amethibitisha kuwa mipango yake ni kurejea kwenye kazi ya ukocha rasmi Juni 30, ambapo ndipo atasaini mkataba mpya.

Mourinho, 53, amekuwa akihusishwa kujiunga na Manchester United hajasema kuwa ni klabu ipi ambayo ataanza nayo kazi itakapofika siku husika licha ya kusema kuwa hajui chochote kuhusu yeye kutua Man United.

Mourinho, alifukuzwa kazi Chelsea, Desemba, mwaka jana baada ya matokeo mabaya ya timu hiyo, alikuwa nchini Mexico juzi kwa ajili ya mechi ya hisani iliyohusisha mastaa wa zamani wa soka kwenye Uwanja wa Azteca, Mexico City.

Alipoulizwa juu ya kuwa nje ya kazi ya ukocha muda mrefu alisema: “Bila shaka nimemisi sana kazi ya ukocha, itakapofika mwisho wa mwezi Juni nitakuwa nimesharejea, leo ni Mei, naendelea kufurahia maisha, nafurahia na familia yangu lakini amini kuwa Julai nitakuwa kazini.”

Alipoulizwa lini hasa atasaini mkataba mpya wa kazi yake hiyo alijibu: “Juni 30, ndiyo siku husika.”