YANGA YAUA HUKO MBEYA, TAMBWE NOMA SANA

LICHA ya kutwaa ubingwa Jumapili iliyopita, kikosi cha Yanga kimeendelea kutoa dozi tena leo mbele ya wenyeji Mbeya City baada ya kuibabua mabao 2-0 katika mchezo wa ligi kuu uliofanyika katika Uwanja wa Sokoine jijini Mbeya.

Alikuwa ni beki Vincent Bossou ambaye aliipatia Yanga  bao la kwanza dakika ya 15 akiunga krosi iliyopigwa na Juma Abdul ikitokana na kona fupi iliyopigwa na Simon Msuva.

Baada ya kuona Yanga inatawa mpira, mashabiki wa Mbeya City walianza kurusha chupa na mawe uwanjani kwa madai ya kutokubaliana na mamuzi ya mwamuzi baada ya mshambuliaji Donald Ngoma kuonekana amejiangusha na refa kuonesha faulo kuelekea upande wao.

Huku wengi wakidhani matokeo yatabaki kuwa bao 1-0, mshambuliaji Amissi Tambwe aliipatia Yanga bao la pili dakika ya 85 na kufikisha 21 baada ya kuachia shuti kali nje ya 18 na kumshinda kipa wa City, Juma Kaseja.