CHAMBERLAIN NDIYO BASI TENA, KUIKOSA EURO 2016

KIUNGO wa Arsenal na Timu ya Taifa ya England, Oxlade-Chamberlain ataikosa michuano ya Kombe la Ulaya ‘Euro 2016’ kutokana na kuwa majeruhi wa goti.

Michuano ya Euro inatarajiwa kuanza kutimua vumbi Juni 10, mwaka huu. England ipo Kundi B ikiwa na Urusi, Slovakia na Wales.

Staa huyo alikuwa na tatizo hilo kwa muda mrefu lakini akiwa anaelekea kupona alijikuta akijitonesha Jumatatu iliyopita na tayari Kocha Arsene Wenger amethibitisha kuwa atakuwa nje kwa wiki kati ya sita hadi nane, hii inamaana kuwa sasa atarejea msimu ujao.

Mara ya mwisho kucheza ilikuwa katika mchezo dhidi ya Barcelona kwenye Ligi ya Mabingwa Ulaya uliopigwa Februari 23, mwaka huu na mpaka sasa amecheza mechi 33 katika michuano yote akiwa na kikosi cha Arsenal.

Wenger alisema: “Hana nafasi kwenye michuano ya Euro. Atarejea mwanzoni mwa mwezi Julai mwaka huu.”