KOLO TOURE ATIA NENO KUHUSU SKENDO YA SAKHO

BEKI mkongwe wa Liverpool, Kolo Toure amemwambia beki mwenzake kikosini hapo, Mamadou Sakho kuwa anatakiwa kuwa imara na mvumilivu wakati huu ambao anakabiliwa na skendo yake ya kutumia dawa za kuongeza nguvu mchezoni.

Mpaka sasa Sakho amefungiwa siku 30 wakati uchunguzi zaidi ukiendelea juu ya sakata lake hilo, ambapo atakosa mechi zote zilizosalia katika Ligi Kuu ya England ‘Premier League’.

Toure amesema hayo kutokana na kile kilichowahi kumkuta mwaka 2011 ambapo alitumia dawa zinazofanana na hizo za Sakho zilizomuingiza matatizoni, ambapo alifungiwa kucheza soka kwa miezi sita.

                                                  SAKHO NA KOPP

 “Najua ana bahati kwa kuwa niko hapa kumsaidia, nawasaidia wachezaji wadogo zangu kwa ushauri hata kwa kupitia makosa yaleyale ambayo niliyafanya mimi,” alisema Toure.

“Anachotakiwa ni kuwa mvumilivu, kuendelea kupambana wakati huu mgumu kutokana na makosa aliyoyafanya.

                                                  SAKHO NA TOURE

“Hata mimi nilipokuwa Arsenal nilijifunza mengi kutoka kwa walionizidi, nilijifunza kutoka kwa Martin Keown.

“Nilipopata tatizo hilo nilikuwa na fikra chanya, ndiyo maana niliendelea kucheza.”