Zlatan akitua kwenye klabu hii, anapewa ufalme wa mji Ujerumani

OBERHAUSEN, Ujerumani

 KLABU ya Rot-Weiss Oberhausen ya Ujerumani imemwambia nyota aliyemaliza mkataba wake PSG, Zlatan Ibrahimovic kwamba: “Ukikubali kujiunga na timu yetu tunakupa ufalme wa mji wetu.”

Rot-Weiss Oberhausen inashiriki Ligi Daraja la Nne Ujerumani ikiwa inafundishwa na Kocha Andreas Zimmerman, inatumia Uwanja wa Niederrheinstadion unaoingiza mashabiki 21,318.

Klabu hiyo imeweka katika mtandao wake baadhi ya makubaliano ya mkataba mpya kama Ibrahimovic atakubali kujiunga nao ni kwamba, atapewa ufalme wa mji wao.

Pia watamjengea bwawa la kuogelea la kienyeji popote atakapotaka na jina lake litatumika kama jina la bia yao, yaani wataiita ‘Ibrahimovic Beer’.

“Kama Ibrahimovic atakubali kujiunga nasi, tutampa ufalme wa mji wetu pia jina lake tutalitumia kuiita pombe yetu ya kienyeji,” ilisema sehemu ya taarifa yao

Ibrahimovic raia wa Sweden amemaliza mkataba wake na PSG akiwa ameifungia mabao 156 katika mechi 180.