Madrid yaiingilia Man United kwa Pogba

MADRID, Hispania

HII sasa vita, kwani baada ya Manchester United kutajiwa bei ya kiungo Paul Pogba wa Juventus kuwa ni pauni milioni 95, Real Madrid nayo imeingia vitani kumuwania nyota huyo.

Rais wa Madrid, Florentino Perez hakuwahi kuwa shabiki mkubwa wa Pogba hata wakala wa mchezaji huyo, Mino Raiola hivyo klabu hiyo haitaki kumuhusisha katika dili hilo.

Lakini taarifa za ndani ya Madrid zinasema, klabu hiyo inataka kumfanya Pogba kuwa mchezaji wa kwanza kumsajili msimu huu licha ya upinzani uliopo kutoka timu za Ligi Kuu England.

Licha ya upinzani huo, lakini Madrid imepata nguvu baada ya Pogba kudaiwa kuchagua kucheza Ligi Kuu Hispania ‘La Liga’ kuliko kurudi England katika klabu yake ya zamani Man United.

Kuna uwezekano Madrid ikamtoa kiungo wake Isco kwenda Juventus ili kurahisisha usajili wa Pogba ili kulainisha klabu hiyo ambayo ilikuwa ikimtaka mchezaji huyo.

Wakati huohuo, Kocha wa Arsenal, Arsene Wenger ameonyesha nia ya kumsajili kiungo wa Leicester City, N'Golo Kante.

Kante raia wa Ufaransa ana umri wa miaka 25, thamani yake inatajwa kuwa pauni milioni 20. Hata hivyo, Wenger ataingia katika vita na klabu za Chelsea na PSG zinazomuwania kiungo huyo.

Katika kuonyesha hisia zake kwa Kante, Wenger alisema: "Navutiwa na uchezaji wake napenda wanaocheza kama N'Golo Kante.”