England mzigoni leo kwenye Euro

MARSEILLE, Ufaransa

TIMU ya taifa ya England leo usiku itacheza mechi yake ya kwanza ya michuano ya Euro 2016 dhidi ya Urusi katika mchezo wa Kundi B kwenye Uwanja wa Velodrome, Marseille.

Michuano hiyo ya 15, ilianza jana Ijumaa ambapo wenyeji Ufaransa walicheza na Romania kwenye Uwanja wa De France katika mchezo wa Kundi A.

Huku mamlaka za usalama zikihakikisha ulinzi kwa timu zote 24 zinazoshiriki michuano hiyo, katika michezo mingine ya leo Jumamosi, Albania itacheza na Uswisi katika Kundi A na Wales itavaana na Slovakia katika Kundi B.

Hata hivyo, katika mchezo wa leo England inaweza kuanza bila ya nyota wake Jamie Vardy, James Milner na Marcus Rashford na badala yake Kocha Roy Hodgson anaweza kuwaanzisha Raheem Sterling na Jack Wilshere au Adam Lallana.

Pia Wayne Rooney na Harry Kane wataanza katika mashambulizi ya kati hivyo nafasi ya Rashford kuwa finyu kikosini.