Coutinho anajua lakini anatia huruma

SUPASTAA wa Liverpool, Philippe Coutinho, juzi Alfajiri alifunga mabao matatu wakati Brazil ikiichapa Haiti mabao 7-1 kwenye Copa America. Siyo ajabu kwa Coutinho kufunga na kuonyesha uwezo bora, ameshafanya hivyo mara kadhaa akiwa na Liverpool na Brazil lakini jamaa anatia huruma kwani katika maisha yake yote ya soka hajawahi kutwaa taji lolote la ligi kuu.

Jamaa ingawa ana miaka 23, amezichezea Inter Milan, Vasco da Gama, Espanyol na Liverpool lakini kote huko hajawahi kunyanyua kwapa akisherehekea ubingwa wa ligi kuu. Mataji ambayo amewahi kuyapata ni Ligi Daraja la Kwanza Brazil (Serie B) akiwa na Vasco da Gama, Coppa Italia, Supercoppa Italiana, Kombe la Dunia la Klabu akiwa na Inter na Kombe la Dunia la U-20 akiwa na Brazil. Pale Liver licha ya juhudi zake zote, hajawahi kunyanyua kwapa!