 |
| Makapu kulia akipambana kwenye moja ya mechi za ligi kuu msimu uliopita |
UNAWEZA kusema ni umafia baada ya uongozi wa Yanga kukubali
kumpa mkataba wa miaka mitatu kiungo wake, Said Juma ‘Makapu’ baada ya pande
zote mbili kufikia muafaka.
Kiungo huyo ambaye alitua Yanga misimu miwili iliyopita
mkataba wake umemalizika hivi karibuni na kuna taarifa kuwa Simba nao walikuwa
wakimtaka na walishafanya naye mazungumzo hali iliyowafanya Yanga waamke na
kumpa mkataba haraka.
Chanzo cha karibu na uongozi wa timu hiyo kiiambia Tanzaniabettingarena
kuwa, mabosi wa Yanga wameshakubali kumpa Makapu mkataba huo wa miaka mitatu,
baada ya kuamini kuwa kutokana na umri wake atakuja kuwasaidia siku za baadaye.
Chanzo hicho kilisema haikuwa rahisi kupewa mkataba huo
mrefu kwani katika mazungumzo yao kulikuwa na mvutano mkubwa, kuna baadhi ya
viongozi walikuwa hawataki apewe mkataba huku wengine wakitaka apewe na ndipo
wote wakakubaliana apewe.
“Kila kitu kimeshakamilika na wanataka kumpa mkataba wa
miaka mitatu kwani wanaamini kuwa kutokana na umri wake ataweza kucheza kwa
kipindi kirefu lakini pia ni baada ya kusikia Simba nao wanamtaka na tayari
walishafanya naye mazungumzo hivyo wakaona wasije wakawahiwa,” kilisema chanzo
hicho.
Meneja wa mchezaji huyo, Yahaya Tostao, alithibitisha kukamilika kwa dili la
mchezaji wake ambapo alisema,: “Hilo la kumpa miaka mitatu ni kweli kabisa na
sasa tumeshafunga mazungumzo na timu nyingine, kilichobaki ni kusaini mkataba
tu lakini vitu vingine vyote vimeshafanyika, kati ya leo au kesho anaweza kusaini.”
Post a Comment