Bossou apata timu Vietnam, awaaga Yanga

LICHA ya kwamba Yanga leo Jumatatu inaanza rasmi kambi yake ya kujiwinda na mzunguko wa pili wa ligi, beki wa kikosi hicho, Mtogo, Vincent Bossou, hatakuwepo katika kambi hiyo kutokana na kuelekea nchini Vietnam.

Bossou ambaye anaunda safu ngumu ya ulinzi ya timu hiyo akishirikiana kwa ukaribu na Kelvin Yondani na Andrew Vicent ‘Dante’, wameweza kuisaidia timu hiyo kumaliza katika nafasi ya pili katika msimamo wa ligi ikiwa na pointi 33 nyuma ya Simba yenye 35.

Leo Yanga inaanza mazoezi kwa mara ya kwanza ikiwa chini ya kocha Mzambia, George Lwandamina baada ya Mholanzi, Hans van Der Pluijm kubadilishiwa majukumu, akipelekwa kuwa Mkurugenzi wa Ufundi klabuni hapo.

Hata hivyo, Bossou hatakuwepo katika mazoezi hayo chini ya Lwandamina.

Bossou ameweka bayana kwamba atachelewa kujiunga na wenzake Jumatatu kutokana na kumpeleka ndugu yake nchini Vietnam kusaini mkataba na moja ya timu za nchini humo ambapo atatua hapa nchini Desemba 3.

“Mimi nitarudi nchini Desemba 3, siku sita baada ya kambi kwa ajili ya kujiunga na wenzangu pamoja na kocha mpya George Lwandamina, nitakosekana kwa siku hizo kwa sababu nitasafiri kuelekea nchini Vietnam.

“Naenda kumsindikiza ndugu yangu kusaini mkataba na moja ya timu za huko pamoja na mimi mwenyewe kumalizana na timu ambayo nitaenda kujiunga nayo baada ya mkataba wangu kumalizika hapa Yanga,” alisema Bossou anayetarajiwa kumaliza mkataba wake mwishoni mwa msimu.